牛市睇資金;熊市睇價值

無庄不成股, 萬市歸於圖, 炒股要有想像力, 何為高何為低呢?
#857中石油約$4.x配股時, 好多人話一隻個幾的股票, 升左3倍有多先來配股, 重有幾多水位上, 結果係重有4倍幾;
#2628人壽$10-時配股, 好多人又話由$4.x升上來, 升左兩倍幾, 仲有幾多水位上? 結果係重有4倍幾升幅;
以上兩隻都是市值巨無霸, 升幅都仍如此強勁, 只因當下大牛市, 由資金推動, 可能唔少價值學者不屑一顧, 認為遲早股價會反映價值, 打回原型。 但在股市中, 股民要清楚手中股票的底子,從而估計當走勢不合預期時, 要怎樣部署退兵, 但無論如何, 最終目的就是在股價升跌中獲利! 一味強調要鑽研股票的實際價值, 指出股價那裡不合理, 似乎就一點忘記了入市的原意, 被價值學者的虛榮感蓋過了賺錢的目的。

短炒T+2

股票市場, 由於交收須時要T+2時間才能完成整個買賣。 T+2即是TRANSCATION DAY +2個交易日才須要付款清數, 一般股票行都會與人以便, 在付款日前賣出股票的話, 只須計算賺蝕差價, 以及酌情計算少少利息, 便可無須先付清全數, 日後再收入賣出金額。這樣一來,造就了不少即市股票炒家, 貪其靈活彈性, 看準一兩日內的走勢而做短線買賣, 筆者亦頗為喜歡, 借力打力!

1)相信不少即市炒家都會用到, 就是開市頭15-30分鐘, 打開20大升幅最高的股票, 再選其中三至五隻成交金額較大的股票短炒;

2) 股價連續兩日大成交突破多重阻力位後, 待其回吐兩日, 一般真正轉勢股, 很少連跌3天以上, 這時待臨收市時買入, 來緊一兩天回復升勢獲利, 近日167, 321,179便是這種走勢;

3)股市不斷下跌, 突然大成交急跌, 這時很有可能是PANIC SALES, 即是連最後一批的股票都沽出, 但有沽就有人買, 第二日一開市不繼續跌反而上升的話, 證明股票已盡數落入強者手, 可跟一兩天短炒搏V型後彈, 但是由於底子已弱, 加上上面阻力重重, 這種走勢一般維持短時間後, 會再試低位支持都未定, 故不宜太貪。

4) 一隻股票第一口價開市就已經潛水, 大小散戶孖展客同時輸錢坐艇, IPO價成封頂價, 沽壓阻力肯定是最大的; 但當浮返上水面IPO價時, 一段潛水的時間, 沽貨的沽貨, 換馬的換馬, 唔會再有太多人持有了, 好明顯大部份股票已落入有心有力人生手中, 無可能會再次浮上水面讓大部份人獲利, 大家都知道, 太多散戶的股票, 係好難升得起的, 庄家唔係慈善家, 後面無水位的話, 又點會大洒金錢抽返上去IPO價上面俾人獲利呢?

筆者在此先講住自己短炒T+2以上方法先, 日後再有心得定必補上。

公司回購要留神

今日, 香港首家內地林業公司——中國林大(0910.HK)停牌了。中國林大停牌, 筆者一點都不覺得突然, 因為有先兆可尋, 而且亦是一個幾普遍的先兆, 就是"公司回購"!!!

公司上市, 最大功能是集資, 不是拋錢出去買回自己的股票的! 這是不合常理的事情! 但為何仍有公司不斷買回自己的股票呢?

其中之一的原因就是大股東可能將自己的股票抵押出去財務, 只要股價一跌超過某個水平, 而大股東又無錢補差價的話, 就好似被人追孖展一樣, 財仔追唔到數就為有斬倉! 這樣一來, 大股東身家就會更加大縮水, 而股價低迷對於來年更難融資!

故此, 大股東(通常身兼公司最高話事人)唯有用公司錢-即是股東們的錢; 來買回公司的股票, 希望托住股價, 穩定人心!

呢D招式無事好地地, 有事就隨時停牌, 甚至出現斬頭式股災! 車不入險地, 無謂賭擔憂注.

《買股要買強勢股》

看過許臨先生《買股要買強勢股》後, 獲益良多,簡單兩句:『買最強勢的行業, 買該行業最強勢的股票』已經表達出炒股的標準及態度!

每次牛市, 除金融及地產股上升外, 總會有另一個主題炒賣, 例如紅籌熱, 科網熱, 以及今次的因美元下跌而出的資源熱, 再加上中國熱。

牛市下, 好多人都見到不止一次, 升來升去都是那兩三類行業, 其如非主流的股票原封不動, 甚至幾年來的牛市仍繼續下跌, 所以選擇行業尤關重要!
牛市中, 怕煩揀行業最好的選擇當然只買2800盈富呢類上版基金啦, 但有得必有失, 要賺到5-10倍就肯定無份啦!

唔好以為賺5-10倍好難, 在大牛市下, 買中當打龍頭股, 一點都不難做到! 如果大家有心機看看各行業的龍頭股, 不難見到但凡龍頭股, 只要當炒, 一定以低位計有10倍以上的升幅！ 問題是, 大家的心魔點看?

心魔: 可以是畏高症！ 一隻有勢的龍頭, 當然離低位有一倍以上的升幅, 而且很多時是這一倍的升幅是一個月內發生的事, 短線而言傾斜度差不多是筆直的,猶如一把斷頭刀掛在上空, 等待閣下入市後就落閘, 真是不入市已被它嚇窒。

另一重心魔就是怕蝕底! 雖然明知股價會繼續上, 但因為已經開了一段路, 感覺已經賺少了, 又或是能買的股數已經少了, 將來賺錢都沒未開車時那麼多! 但很奇怪, 當股票回吐時, 又不敢趁底吸納, 怕/貪仲有得跌, 還可以有更平的貨買到。

人的心中, 好多時都唔止得一隻鬼存在, 同一時間存在各式各樣大大細細的小鬼, 阻住地球轉!!!

股票市場上, 最基本分成價值投資及技術分析兩大門派, 由於巴菲特是價值投資的表表者, 顯得技術分析比下來, 甚至於給人旁門左道的感。 但大家留意一下, 股神巴菲特買的股票, 大多是行業的龍頭股, 麥當勞、吉列鬚刨、中石油比比皆是…只要該行業一發力, 在龍頭大升的情況下, 自然水漲船高、身家暴漲了!

曾經聽過這樣形容一個現象:『價值投資vs價值投機』, 當市場一發現主題後, 資金就會在其他有投資價值的股票抽走出來, 走往當炒的股票上, 變成該原有投資價值的股票, 股價在資金推動下不斷往上升至不合理水平, 造成價值投機! 換句話說, 一隻原有長線價值的股票, 在資金帶動下, 濃縮了時間變成一隻投機性重的股票; 而其餘本身有價值投資的股票, 卻因資金不段抽走造成股價沽壓, 越不能反映本身價值， 最終就是本身兩隻同時有投資價值的股, 卻因資金流向而各走極端, 形成『價值投資vs價值投機』的現象!!!

投資投機兩棲動物，不是學者，不會死撐往日言論，若市場認為現價合理，經過一段時間仍屹立於此，不合理化成合適，在有系統訊號之下，筆者不介意以今日的我打倒昨日的我，那怕30000點也會入市投機!

Market is always right. My job is to make money ..rather than to outsmart the market

以上兩段話, 是一位炒股的blog友寫的, 對炒股一族來說, 道遠尤長.

創業夢

好似股市經濟一樣, 筆者每隔幾年就會來一個循環, 都會來過創業夢, 大都圍繞著飲食零售行業, 或許是因為這些行業每日都包圍著自己吧! 要創業, 總離不開金錢, 資本市場講求資本, 今時今日香港做個體戶, 面對著不只是連鎖式大財團傾銷, 更甚的是創業資本比以前更多。 所謂店大欺客, 客人購物不只講求價廉物美, 同時亦要要求氣氛門面裝潢, 除非是熟客生意, 否則沒像樣點的裝修, 要吸引顧客入店都難, 更莫論幫趁做得成生意！ 坊間簡簡單單五百尺的店舖, 似樣的裝潢最少要十幾廿萬, 再加上店舖按金, 電費按金, 設備, 存貨, 推廣費用, 預留現金等等, 最少相信也要50萬現金才能開業! 50萬現金, 筆者相信不少香港人都可不難搵到, 但要儲50萬現金的話, 又談何容易呢! 筆者試過在網絡論壇上問過百多個網友, 一般廿多卅歲有數年工作經驗的打工仔, 每月扣除使費家用後, 能每月儲到五六千的已算幾好, 當然有些環境好少少的可以儲到萬元左右。 就當每月能儲一萬元, 五十萬也要用四五年時間才能達成基本目標。幾十萬現金, 說多不多, 少也不少呢, 世上除非是壟斷行業, 基本上沒有必賺的生意, 一個沒生意經驗的中年人(幾十萬儲到後可能已年到卅至卅幾歲吧), 會放下現在的職業, 跳入一個迷糊的地方嗎? 這也是機會成本之一啊！ 如是者, 今時香港人要創業比七八十年代真是難好多了。 以上種種, 都是使筆者對創業卻步的原因, 過不到老闆癮, 或者天生早註定吧。
幸好, 香港是一個世界金融城市, 視野資訊都比較開放, 股票英文英式叫SECURITIES;美式叫STOCK。 STOCK-不正是創業所須的主要材料嗎? 自始, 筆者就投身股市市場, 看看每段時間有什麼好貨, 買入賣出, 賺取差價過過癮。起碼無須租舖交租, 亦不必做太多碎事, 而且亦可同時上班, 賺取更多買貨資金。算是滿足筆者一部份的創業夢吧！

地產股/酒店股簡單估值

地產及酒店股簡單估值

大凡大牛市, 金融股及地產股必定是主角之一, 原因是牛市必會大幅推動財富轉移, 金融股及地產股肯定是最受益的行業!!!

先講講地產, 一般坊間對地產股的計法繁複, 就算會計帳目上的物業公平計算收益, 很多時都會與實際有很大出入! 筆者向來喜歡簡單就是美, 而且重要快靚正, 所以內房股在下會以1萬銀1平方米來將股票估值, 因為係以賣價計, 地產佬一向食水深, 賣一間差不多賺三間, 賣左後先計數, 到時先反映市值的話, 股價已經升到天價啦, 所以用賣樓尺價計我認為最實際! 其實幾多錢一米都唔係個point, 個point係用來比較邊隻地產股有錢途, 股價仲有水位上嘛.

國內建築成本每尺約$400-(約4300/米)+地價約$1200/米, 成本已$5500/米, 今日市勢新樓GP有5-6成, 即係每米最少要賣$11,000/米, 賣1間賺1間...所以內房股來緊3-5年條數好易計!!!

仲有, 做地產發展一般分4-5期俾建築商, 而尾期一般都係借頭借路扣數用的, 呢筆數都未計呢...

任何國家都好, 要分享經濟起飛, 一定要投資該國中型至大型地產股, 原因好簡單, 經濟好通貨膨脹高, 手上d錢唔值錢就自然買樓房"保值", 全世界人的觀念都係咁, 咁地產股又有乜理由唔豬龍入水?!

以下是深圳控股(604)的業績新聞:

深圳控股半年賺７﹒０１億元，升８﹒１倍，派息８仙

2007/09/12 09:21

　　《經濟通通訊社１２日專訊》深圳控股（０６０４）公布，截至今年６月３０日止半年業績
，純利７﹒０１億元，升８﹒１倍，每股基本盈利２４﹒５９仙，每股攤薄盈利２３﹒７２仙，
派中期息每股８仙。
　　期內，營業額９﹒１３億元，升５７％；毛利４﹒８７億元，升９０％。
　　截止過戶日期１０月１５日至１７日，派息日１０月２５日。（ｔｓ）

大家睇下, 做9億生意毛利有成4.8億, 真係賣一間賺一間, 講緊的是賣樓唔係賣魚蛋喎, 你話經濟好地產更好!!! 仲未計賺埋個商場/車位/未來每月的管理費呢d無形利潤呢?!

至於香港地產股, 計法原則亦差不多, 只不過是香港地價貴, 數字上會有所差別而已, 但起一個幾萬尺豪宅, 或者只是四五千的平民樓, 除非地下是容洞, 否則的話建築成本大家都是差不多, 只要將市價減去建築成本就知該股未來所有土地售出後的估值了.

以地鐵為例, 與九鐵合併後後樓面建築面積即達3500幾萬尺, 再發水10%計, 以地鐵上蓋物業新樓@$6000/尺, 減去九鐵收購價78億, 再減計建築成本@$1200/尺, 樓價已值1770億!!! 同其他地產股一樣, 仲未計賺左個商埸租金, 管理費等軟件收入...而家市值只有1530億...真真正正大折讓!!!

以上方法, 看似兒戲, 但實際上好多fund佬其實都係類似計法, 唔係你睇點解佢地會插旗落去, 唔怕中國"地大勿搏"呀?!

計完中國及香港地產股的估價, 再講下酒店股的估值, 比中國地產股更簡單:

擁有房間數目, 根據所屬星級一般日租, x 365日 x 80%使用率 / 8%回報就是.

以錦江(2006)為例, 2萬間房, 當所有酒店都是廉價房$150/日計:

20,000 x $150 x 365日 x 80%使用率 / 8%回報 = 估值$100億.
所以現價53億市值真是超值.

(補充: 再簡單些以房間出租收入 / 8%回報都可以估值.)

406有利為例, 最近賣了快捷假日酒店酒店收15.8億, 料獲利７億元. 買家點解會咁重手? 佢條數又係點計呢? 快捷假日酒店有269間房, 根據2007年12月每日房租平均約$1200-(不計聖誕), 估值都要約12億, 看似少於人地的買入價, 但不要忘記在下計法是以8%N.P.回報, 但今時今日減息潮下, 銀行活期都只得4.x%, 意味著買家少於8%回報都仍肯投資!

Happy Trading

由初玩藍籌二三線窩輪到期指, 再轉回專攻龍頭股, 炒股十幾年, 多少想記錄低自己心血路程, 好讓日後回味. 炒股如人生, 有起有落, HAPPY TRADING基本上是一個簡單的股市起跌路程, 一個決定, 影響往後人生財務自由.